修甲記

之前我咪話過媽媽買左舊木粟米俾我玩, 睇下可唔可藉住玩條木粟米而起到磨爪作用o既....

其實媽媽係冇真正俾過舊木粟米我架... 因為佢話我 d 指甲太長, 驚我反而會整親 d 長指甲喎...

而且就o係果晚, 我見到媽媽, 就諗住咬籠叫佢醒 d 好野我食啦, 點知想落返地地時,

有隻指甲攝左o係 d 邊位度, 咁我咪大力抆返出o黎囉 , 咁用力抆就梗係要 "唏" 一聲助下勢架啦,

媽媽聽到後以為我夾親 d 指甲而發出 "吱" 一聲o既慘叫聲...

就係呢一下出力o既 "唏" 變左慘叫o既 "吱"  , 媽媽就決定唔再俾機會我自己磨指甲,

取而代之就係要盡快帶我去獸醫度修甲喇 ...................

本來媽媽想帶我去天后鬼佬獸醫度架, 不過一問之下, 原來果位獸醫已有成年冇o係香港,  仲要唔知幾時會返,

媽媽又實在對剩返果 D 獸醫冇信心,  於是諗住帶我去大圍老虎獸醫度啦,

不過如果係平日,  我媽媽放工後都趕唔切帶我去果度 lu,

而且因為我 "吱" 左一聲, 媽媽就覺得事不宜遲, 實在等唔到星期六日 ,

加上大圍又實在遠左 d , 媽媽怕我咁長途路線會好辛苦, 而且咁遠水路只係為左去剪個指甲似乎太勞動...

所以明查暗訪下, 決定帶我去唔少人都話好 o既 跑馬地 E 獸醫度喇~~~

就係咁, 上星期四, 就係我受刑o既日子喇............

仲記得去 E 獸醫果度o既途中, 我有段時間感到非常搖晃, 十分之唔舒服, 好似地震咁...

一時停止, 一時又係咁 chalk chalk 下, 原來係因為我坐緊車車,

果時幾鬼辛苦呀.... 乜都唔想, 只係想快 d 去到獸醫度, 唔駛再坐震震車咋....

好彩一路上媽媽都有睇住我咋, 如果唔係真係驚上加驚, 一定會更加唔舒服呢~~~

幾經辛苦, 終於去到獸醫果度喇

一去到果度, 我就聞到有貓貓味, (以前o係愛協時聞得多, 所以就知係貓貓味喇),

抬頭一睇, 見到有塊好似針板o既大扁面望住我... 正式o黎講係一隻有塊針板面o既貓..

個樣認真怪誕.. 都唔知點解媽媽見到佢會咁開心...

媽媽仲同我講, 果隻針板面叫做異國短毛貓喎... 連個名都寧舍怪... 嘿!!

等左一陣後, 終於到我喇...  我聽到媽媽一開口就咁樣向 E 獸醫介紹我 "呢個肥仔呢......." 激死!!!!!!

媽媽講完一輪廢話開場白後, E 獸醫就話 :" 真係好少幫倉鼠剪指甲喎...  "

跟住媽媽開玩笑地問 E 獸醫:"咁你有冇信心剪呢..??"

E 獸醫好有信心咁話 :"有~~~梗係有啦!! "

我當時個心諗.. "嘩!!! 大佬... 老老實實, 你冇信心就出聲呀... 我好矜貴架... 剪親我你就知味道... 嘿!!!!!!!!!!!!! "

實情跟住發生咩事我都唔係好知... 剩係隱約聽到 E 獸醫同左右護法商量究竟點剪我 d 指甲好,

跟住 E 獸醫就地取材, 拎左我個運鼠專用兜兜入面個抹手紙筒出o黎, 個抹手紙筒係媽媽特登由我屋屋拎出o黎放入去架,

佢話個抹手紙筒會有我陣味, 等我出街街唔駛咁緊張喎...

咁 E 獸醫拎左個抹手紙筒出o黎後, 左右護法即時有所動作,

一個搵個抹手紙筒笠住我個頭, 我都o黎唔切反應, 另一個護法就捉住我屁股...

我被笠住左, 都唔知週圍發生緊 d 咩事, 又郁唔到喎,  只係覺得有另一個人開始剪我 d 指甲咋...

咁當時得媽媽, E 獸醫同左右護法四個人,

左右護法已各有任務, 媽媽又唔會夠膽幫我剪架喇... 咁剪我 d 指甲果個一定係 E 獸醫啦~~~

時間好似過得好慢咁, 都唔知過左幾耐喇... 終於我被解封... 睇情況應該剪好喇~~

跟住我梗係睇下自己 d 指甲啦... 嘩~ 兩隻前腳最開面轉晒彎o既指甲唔見左...

唔細心睇都唔覺有指甲o係度....  不過即時行步路都輕鬆左好多, 剪完後果然好舒服噃....

雖然剪左咁多, 但我又唔覺得我有咩問題, 即係冇話剪到我流血血或痛痛呀咁啦...

嗯..... 睇 o黎 E 獸醫o既手勢都算 ok ~~~ 算佢啦~~~~

至於今次剪指甲收幾多錢, 我就唔知喇...

剩係聽到媽媽話我係衰仔, 又話我要食少 d 先得, 又話自己唔知要食幾多餐麵包咁喎...

媽媽係咁一輪咀咁哦我, 都唔知為乜...  

我就一於唔理咁多 lu, 反正依家輕鬆舒服開開心心就得啦~ yeah~~~ 

呢個就係我根據媽媽口述而想像出o黎o既剪指甲情況... 希望大家睇得明啦...